Ўзбекистон асосан қайси давлатларга экспорт қилмоқда?

2026 йил январ–апрел ойларида Ўзбекистоннинг умумий экспорт ҳажми қарийб 10 миллиард АҚШ долларини ташкил этди. Миллий статистика қўмитасига кўра, мамлакат маҳсулотлари энг кўп Россия, Хитой ва Афғонистон бозорларига етказиб берилган.

Экспорт географияси Ўзбекистон ташқи савдосида қўшни давлатлар ва йирик иқтисодиётларга эътибор кучлилигича қолаётганини кўрсатади. Айниқса, Россия 1,5 миллиард долларлик кўрсаткич билан мамлакатнинг энг йирик экспорт бозори бўлиб турибди.

Иккинчи ўринни 919,6 миллион доллар билан Хитой эгаллаган бўлса, Афғонистон 643,7 миллион долларлик натижа билан учинчи ўриндан жой олди.

Шунингдек, бу даврда Францияга экспорт ҳажми 498,6 миллион долларга етган. Бу кўрсаткич мамлакатнинг Европа бозорларидаги иштирокини кенгайтириш имкониятлари мавжудлигини кўрсатади.

Қозоғистонга 425,5 миллион долларлик, Туркияга 361,4 миллион долларлик маҳсулот экспорт қилинган. Шу жумладан, Бирлашган Араб Амирликларига экспорт ҳажми 265,5 миллион долларни ташкил этган.

Қирғизистонга 254,2 миллион долларлик, Тожикистонга 213,3 миллион долларлик маҳсулот етказиб берилган. АҚШ эса 122,5 миллион долларлик экспорт билан ўнликдан жой олган.