Уруш 20 апрелда тугайдими? Уруш таҳлили эълон қилинди

Урушни ўрганиш институти (ISW) таҳлилчиларига кўра, Россия Украинада сўзсиз ўт очишни тўхтатиш учун АҚШ президенти Доналд Трамп томонидан белгиланган “психологик муддат”ни қабул қилиши даргумон.

ISW ҳисоботида қайд этилишича, Россия аввалроқ Қора денгизда вақтинчалик ўт очишни тўхтатиш шартларини илгари сурган. Талаблар орасида Росселхозбанк ва бошқа молия институтларига қарши Ғарб санкцияларини бекор қилиш, шунингдек, ушбу ташкилотларнинг SWIFT тизимига уланишини тиклаш киради.

Таҳлилчиларга кўра, ўт очишни тўхтатиш бўйича келишувларга ҳали эришилгани йўқ ва шартлар тўлиқ келишиб олинмаган бўлса керак. Шу нуқтаи назардан, 20 апрелгача келишувга эришиш даргумондек.

Ҳисоботда, шунингдек, Россия АҚШ ва Украина ўртасидаги кончилик бўйича потенциал келишувни бузишга уринаётгани айтилган. ИСW Россия тўғридан-тўғри инвестициялар жамғармаси раҳбари Кирилл Дмитриевнинг Москва ва Вашингтон нодир ер элементлари соҳасидаги қўшма лойиҳаларни муҳокама қилаётгани ҳақидаги баёнотларига эътибор қаратди.

Мутахассисларнинг фикрича, Россия шу йўл билан Трамп маъмуриятининг режаларини бузиб, ўзини стратегик ресурсларнинг муқобил етказиб берувчиси сифатида кўрсатмоқчи.

ISW шунингдек, АҚШ ва Россия ўртасидаги иқтисодий ҳамкорлик Кремлни келажакда Украинага янги кенг кўламли босқиндан тўхтата олмаслигини таъкидлайди.

Аввалроқ Доналд Трамп Владимир Путиннинг ҳаракатларидан норозилигини билдириб, Россия нефтига иккиламчи божлар жорий этиш билан таҳдид қилганди. У Финляндия президенти Александр Стуббнинг таклифига биноан 20 апрелгача “психологик муддат”ни белгилади.