"Украинага узоқ масофали Tomahawk ракеталарини беришимиз керак"

Агар Путин яна "йўқ" деса, Россияга қарши санкцияларни кучайтиришимиз ва Украинага узоқ масофали Tomahawk ракеталарини беришимиз керак, деди АҚШ сенатори Линдси Грэм

Унинг сўзларига кўра, АҚШ Россия билан мулоқотни давом эттирмоқда, аммо Путин барча саъй-ҳаракатларни рад этмоқда.

"Агар Путин бу сафар ҳам яна “йўқ” деса, умид қиламанки, президент Трамп менинг санкциялар тўғрисидаги қонун лойиҳамни имзолайди, ҳозир унинг 85 нафар ҳаммуаллифи бор. Бу қонун лойиҳасида Хитой каби Россиянинг арзон нефтини сотиб олаётган давлатларга нисбатан божлар жорий этиш, Россияни терроризмни қўллаб-қувватловчи давлат сифатида тан олиш, шунингдек, Венесуэлага нисбатан қилинаётгани каби санкциялар остидаги Россия нефтини ташиётган кемаларни ушлаб қолиш ва мусодара қилиш назарда тутилган.

Агар Путин таклифимизни рад этса, биз ўйин қоидаларини тубдан ўзгартиришимиз керак — жумладан, Россия ҳудудида жойлашган дрон ва ракета заводларига зарба бериш учун Украинага Tomahawk ракеталарини топширишни ўйлаб кўришимиз зарур", — деди америкалик сенатор.