Украина президенти Запороже атом электр станциясининг тақдири икки томон учун ҳам жиддий муаммо эканини таъкидлади

"Аслида, Запороже АЭСнинг мавжудлиги Украина иштирокисиз имконсиз. АЭСни тиклаш учун катта маблағ ва бир неча йил вақт керак. Дамба йўқ, техник сув йўқ. Унинг фаолиятини тиклаш учун ўта қиммат жараёнлар талаб қилинади. Бу биз учун ҳам муаммо, чунки бу бизнинг атом электр станциямиз. Бу жуда катта йўқотилган пуллар, йўқотилган имкониятлар дегани", – дея муносабат билдирди Зеленский.

Шунингдек, у Россия томони АЭСни ўз энергетик тармоғига улаб, Украинанинг босиб олинган ҳудудларини электр энергияси билан таъминлашни режалаштираётганини маълум қилди.

Маълумот учун, Зеленский Украина ва АҚШ ўртасида Жидда шаҳрида бўлиб ўтган музокараларида Запороже АЭС масаласи кўтарилганини тасдиқлаган эди.

Икки кун олдин АҚШ президенти Доналд Трамп ҳам музокараларда мазкур АЭС мавзуси муҳокама қилинганини айтганди. Унинг сўзларига кўра, Запороже АЭСнинг кимга тегишли бўлиши масаласи оташкесимдан сўнг, тинчлик келишувига тайёргарлик жараёнида муҳокама қилинади.

Эслатиб ўтамиз, Запороже АЭС ҳозирда Россия назоратидаги Энергодар шаҳрида жойлашган. Москва эса Украинага босиб олинган ҳудудларни қайтариб бермаслигини маълум қилган.