Украина 12 майдан бошлаб 30 кунлик ўт очишни тўхтатишга тайёр

Украина 12 майдан бошлаб 30 кунлик ўт очишни тўхтатишга тайёр.

Бу ҳақда Украинада бўлиб ўтган учрашув якунлари бўйича мамлакат ташқи ишлар вазири Андрей Сибига маълум қилди.

Сибига, шунингдек, Зеленский, Стармер, Макрон, Мерц ва Туск Трамп билан телефон орқали суҳбатлашганини билдирди.

"Киевдаги “хоҳловчилар коалицияси” учрашувидан сўнг беш нафар етакчи — Володимир Зеленский, Эммануел Макрон, Фридрих Мерц, Доналд Туск ва Кир Стармер АҚШ президенти Доналд Трамп билан тинчлик ташаббуслари бўйича конструктив телефон суҳбати ўтказди.

Украина ва барча иттифоқчилар қуруқликда, ҳавода ва денгизда ҳеч қандай шартларсиз, тўлиқ ўт очишни тўхтатишга тайёр, бу келаётган душанбадан бошланиши мумкин.

Агар Россия рози бўлса ва самарали мониторинг таъминланса, узоқ муддатли ўт очишни тўхтатиш ва ишончни мустаҳкамловчи чоралар тинчлик музокараларига йўл очиши мумкин", — деб ёзди Украина ТИВ раҳбари Х ижтимоий тармоғидаги саҳифасида ва бу суҳбатдан фото ҳам эълон қилди.

Аввалроқ Россия сулҳга фақат Ғарб давлатлари Украинага қурол етказиб беришни тўхтатган тақдирда рози бўлишини билдирган эди.