Туркиянинг Ўзбекистонга техник кўмаги кенгайтирилади, қатор соҳаларга турк экспертлари жалб қилинади

Инвестициялар ва ташқи савдо вазирлиги ҳузурида тасдиқланган штат жадвали доирасида турк инвесторлари билан тизимли ишлашни йўлга қўйиш мақсадида Лойиҳа офиси ташкил этилади. 

Norma’нинг ёзишича, жадал саноатлаштириш ва замонавий инфратузилмани ривожлантириш, халқаро стандартларни жорий этиш, махсус иқтисодий зоналарнинг самарали фаолиятини ташкил этиш бўйича илғор тажрибаси ва инновацион ёндашувларини жорий этиш масалалари бўйича маслаҳатчи сифатида турк экспертларини жалб этиш режалаштирилмоқда.
 
Қарорга мувофиқ Туркия Ҳукуматининг қуйидаги йўналишлар бўйича техник кўмаги кенгайтирилади ва етакчи турк экспертларини жалб қилинади:

• соғлиқни сақлаш инфратузилмаси объектларини бошқариш соҳасидаги салоҳиятини ошириш;
• сейсмология соҳасидаги институционал ва норматив базани мустаҳкамлаш, замонавий халқаро стандартларни жорий этиш;
• йўллар ва йўл бўйи инфратузилмасини қуриш ҳамда улардан самарали фойдаланиш соҳасида халқаро стандартларни жорий этишга кўмаклашиш;
• «электрон ҳукумат» соҳасида Туркия Республикасининг энг яхши ечимлари ва технологияларини жорий этиш.

 Аввалроқ, Туркия Ўзбекистондаги олтин конларини қазиб олиш лойиҳаларида иштирок этиши хабар берилганди.