Transporter-12 миссияси доирасида SpaceX компаниясининг Falcon 9 ракетаси турк компаниясининг биринчи сунъий йўлдоши Fergani Space FGN-100-d1 ни орбитага муваффақиятли олиб чиқди.
Учириш АҚШдаги Ванденберг ҳаво кучлари базасида бўлиб ўтди ва SpaceX аккаунтларида жонли эфирда намойиш этилди.
Transporter-12 миссияси давомида Falcon 9 ракетаси коинотга 131 та фойдали юкни олиб чиқди. Улар орасида кубосатлар, микросателлитлар ва орбитал транспорт воситалари мавжуд. FGN-100-d1 сунъий йўлдошидан ташқари космик технологияларни фаол ривожлантираётган яна бир турк компанияси Plan-S сунъий йўлдошлари ҳам орбитага чиқарди.
Fergani Space сунъий йўлдоши учун водород пероксид асосидаги космик двигателнинг синовлари ўтган йилнинг май ойида муваффақиятли якунланди ва бу миссияга тайёргарликнинг муҳим босқичларидан бири бўлди.
Fergani Space асосчиси, Baykar бошқарув кенгаши раиси Селчук, Байрактар Туркиянинг биринчи сунъий йўлдошини орбитага муваффақиятли чиқарганини айтди.
“2022 йилда ишга туширган Fergani Space корхонаси 106 кишилик катта оила сифатида ривожланишда давом этмоқда. Бугун биз биринчи турк сунъий йўлдошини орбитага чиқардик. Бизнинг сунъий йўлдошларимиз жойлашишни аниқлаш ва алоқа мақсадларида паст орбитали юлдуз туркуми бўлиб хизмат қилади. Биз бу лойиҳани ўз кучимиз билан амалга оширдик. Айни вақтда сунъий йўлдошимиз керакли баландликка етди ва биринчи маневрларини якунлади”, – деди Селчук Байрактар.
Мутахассисларнинг таъкидлашича, FGN-100-d1 сунъий йўлдоши “Fergani Space”нинг космик технологиялар ва навигация тизимларини ривожлантириш бўйича глобал миссиясининг биринчи босқичи бўлди. Ушбу космик лойиҳанинг муваффақиятли амалга оширилиши Туркиянинг коинотни ўрганишдаги роли ортиб бораётганини ва миллий сунъий йўлдош инфратузилмасини яратишга интилишини кўрсатади.
