Туркияда ИШИДга қарши аксилтеррор операциясида 3 нафар полициячи ҳалок бўлди

Шунингдек, 6 нафар жангари ўлдирилди, деб хабар бермоқда Reuters.

Мамлакат ички ишлар вазири Али Ерликаянинг маълум қилишича, куч тузилмалари 29 декабр, душанба куни Мармара денгизи соҳилидаги Ялова шаҳридаги уйлардан бирида терроризмга қарши операция ўтказган.

"Ҳужум чоғида камида олти нафар ИШИД жангарилари ўлдирилди. Шунингдек, террорчилар полициячиларга ўт очганидан сўнг уч нафар полисия ходими ҳам ҳалок бўлди. Яна саккиз нафар полициячи ва бир нафар хавфсизлик ходими яраланган", — дея аниқлик киритди Туркия ИИВ раҳбари.

Полиция ҳужумда ўлдирилган 6 жангарининг барчаси Туркия фуқароси бўлганини маълум қилди. Шунингдек, уйдан беш нафар аёл ва олти нафар бола тирик чиқариб олинган.

Ўтган ҳафта Туркия полицияси Янги йил байрамида ҳужумлар уюштиришни режалаштирганликда гумон қилинган 115 кишини қўлга олганди. Сўнгги бир ой ичида полиция жами 138 кишини ҳибсга олди. Душанба тонгида эса Туркия бўйлаб 15 вилоятдаги 108 та манзилда бир вақтнинг ўзида операция ва тинтувлар ўтказилганди.