Туркия ва Россиядан оғир аҳволда қолган 21 нафар ўзбекистонлик ватанга қайтарилди

«Ватанга қайтариш» акцияси доирасида Туркия ва Россияда мушкул аҳволда қолган фуқаролар Миграция жамғармаси ёрдамида юртга олиб келинди.

«Ватанга қайтариш» хайрия инсонпарварлик акцияси доирасида Туркия ва Россияда қийналган ҳолатда қолган 21 нафар ўзбекистонлик ватанга қайтарилди. Бу ҳақда «Дунё» ахборот агентлиги хабар берди.

Маълумотларга кўра, Ўзбекистон дипломатлари Туркиянинг Мерсин вилоятида яшовчи ватандошлар билан учрашиб, сайёр консуллик қабулини ўтказди. Қабул жараёнида 18 нафар фуқарога Миграция жамғармаси маблағлари ҳисобидан авиачипта харид қилиниб, Uzbekistan Airways чартер рейси орқали Анталия — Тошкент йўналишида юртга олиб келинди.

Шунингдек, Россиянинг Новосибирск шаҳрида бўлган уч нафар ўзбекистонликка Ўзбекистон Бош консулхонаси ва Миграция агентлиги кўмагида ватанга қайтиш сертификатлари расмийлаштирилди. Улар 4 август куни Uzbekistan Airways самолёти билан юртга кузатилди.

30 июлдан бошланган «Ватанга қайтариш» акцияси 30 августгача давом этади. Лойиҳа доирасида АҚШ, Жанубий Корея, Россия ва яна 5 давлатдаги депортация марказларида сақланаётган ўзбекистонлик аёллар ва болалар юртга қайтарилиши режалаштирилган.

Ташкилотчилар маълум қилишича, 7 августга қадар 30 дан зиёд элчихона ва консулликлар хориждаги депортация марказларидаги фуқаролар рўйхатини Миграция агентлигига тақдим этади. Кейин 15 августгача зарур ҳужжатлар тайёрланади ва авиачипталар харид қилинади. Шунингдек, фуқаролар бевосита агентликка мурожаат қилса, ариза бир кунда кўриб чиқилиб, икки кун ичида йўл чиптаси билан таъминланади.