Туркия банклари эски намунадаги 50 ва 100 долларлик купюралар харидини тўхтатди

Туркияга 600 млн доллар миқдоридаги 50 ва 100 долларлик сохта купюралар олиб кирилгани иддаоси ортидан банклар ва валюта айирбошлаш шохобчалари эски доллар банкноталари харидини тўхтатди. Маълумотларга кўра, пул санаш аппаратлари ва банкоматлар сохта банкноталарни ажрата олмаяпти.

Туркия оммавий ахборот воситаларида ёзишларича, бозорда 1 ярим ойдан бери сохта 50 ва 100 долларлик купюралар айланиб юрибди. Ушбу банкноталар дастурий таъминот янгиланмаган пул ҳисоблагичларидан ўтаётгани маълум бўлгач, банклар ва валюта айирбошлаш шохобчалари уларни сотиб олишни тўхтатди. Айрим валюта айирбошлаш шохобчалари эски банкноталар учун комиссия тўлови жорий этган.

Туркия Банклар Ассоциацияси (ТББ) банкларни сохта 50 ва 100 долларлик банкноталар ҳақида огоҳлантирган.

Барча ваколатли муассасалар ва валюта айирбошлаш шохобчалари уюшмаси (TÜYEMDER) бошқаруви аъзоси Мустафо Унвер, Банкларни тартибга солиш ва назорат қилиш агентлиги ва Ғазначилик вазирлиги билан бу борада музокаралар олиб бораётганликларини айтган. У, шунингдек, бозорда 600 миллион долларлик сохта пул борлигидан хабардорлигини билдирган.

“Бу фақат Истанбул билан чекланиб қолмаган, кўплаб вилоятларга тарқалди. Биз пул ҳисоблаш машиналаримизни янгиладик, аммо бу етарли эмас. Ушбу машиналар четдан олиб келингани боис, биз чет элдан янгиланишларни кутамиз”, дея таъкидлаган у.