Трампнинг эҳтимолий вориси маълум қилинди

Трамп Жей Ди Вэнсни ўз вориси сифатида танлади.

АҚШ президенти Дональд Трамп кейинги президентлик сайловларида ўзининг эҳтимолий вориси сифатида вице-президент Жей Ди Вэнсни танлаган ва республикачи донорларни уни қўллаб-қувватлашга чақирган. Бу ҳақда «Вашингтон Пост» ўз манбаларига таяниб хабар берди.

«Охир-оқибат, биз Жей Дини сайлашимиз керак», — деган Трамп донорлар билан суҳбат чоғида.

Нашр манбаларига кўра, Овал кабинетдаги учрашув июль ойининг иккинчи ярмида бўлиб ўтган.

«Вашингтон Пост» таъкидлашича, Трампнинг бу баёноти унинг оммавий чиқишларидаги риторикасидан фарқ қилади. Бу эса Жей Ди Вэнс ва АҚШ давлат котиби Марко Рубио ўртасида Республика партиясидан президентликка номзод бўлиш учун кураш кучайишига олиб келиши мумкин.

Трампнинг Вэнсни қўллаб-қувватлаши унинг 2028 йилги президентлик сайловларида Республика партияси номзоди бўлиши эҳтимолини сезиларли даражада ошириши мумкин.