Трампнинг Афғонистондаги NATO миссиясининг роли ҳақидаги баёнотлари шармандали

Трампнинг Афғонистондаги NATO миссиясининг роли ҳақидаги баёнотлари ҳақоратомуз, ноўрин, ва шармандали — Буюк Британия бош вазири.

Қўшма Штатлар президенти Доналд Трамп Fox News телеканалига берган интервюсида Афғонистондаги амалиёт вақтида NATO'нинг иттифоқчи кучлари фронт чизиғидан узоқроқда бўлишга ҳаракат қилганини айтганди. Унинг сўзлари Буюк Британиянинг барча йирик партияларидаги сиёсатчилар томонидан қораланди.

"Аввало, Афғонистонда ҳалок бўлган қуролли кучларимизнинг 457 нафар ҳарбий хизматчисини хотирламоқчиман. Бундан ташқари, Афғонистонда кўпчилик аскарларимиз жароҳат олди. Улардан баъзилариники шу даражада оғир эдики, ҳаётини бутунлай ўзгартирди. Шунинг учун мен президент Трампнинг сўзларини ҳақоратли ва тўғридан-тўғри айтганда, ғазаблантирувчи деб ҳисоблайман. Бу гаплар ҳалок бўлганлар ва ярадорларнинг яқинларига шунчалик оғриқ етказганига ажабланмайман", — деди бош вазир Кир Стармер Даунинг-стритдаги видеомурожаатида.

Маълумот учун, 2001 йил 11 сентябр террор ҳужумларидан кейин NATO ўз тарихида биринчи ва ягона марта 5-моддани ишга солган. Кўплаб мамлакатлар, жумладан Буюк Британия, Афғонистонда АҚШ раҳбарлигидаги ҳарбий операцияда иштирок этган. Миссия давомида NATO'нинг қатор давлатлари ҳарбийлари ҳалок бўлган, улар орасида Канада, Франция, Германия, Италия, Полша ва Дания ҳам бор. Операция 2021 йилда “Толибон” ҳаракати ҳужуми фонида қўшинларнинг олиб чиқилиши билан якунланган.