Трамп яна Россияга таҳдид қилмоқда

АҚШ президенти Дональд Трамп россиялик ҳамкасби Владимир Путин Украинадаги урушни тўхтатмаса, унга нисбатан санкциялар қўллаш билан таҳдид қилди.

Америка етакчисининг нутқи Оқ уйнинг ижтимоий тармоқлардаги саҳифаларида эфирга узатилди.

Трамп икки ҳафта ичида "Украинадаги урушни тартибга солиш бўйича жуда муҳим қарор” қабул қилишини таъкидлади. Унинг сўзларига кўра, бундай қарор санкциялар, мажбуриятлар ёки "ҳеч нарса" ни ўз ичига олиши мумкин.

"Агар керак бўлса, икки ҳафта ичида Россияга нисбатан санкциялар бўйича қарор қабул қилишим мумкин", — деди АҚШ президенти.

Шу икки ҳафта ичида у Москва ва Киевнинг можарони ҳал қилишга “ёндашувлари” билан танишмоқчи. Шундан сўнг у Украинадаги тинчлик музокараларининг тўхтаб қолишига ким масъул эканини аниқлайди.