АҚШ президенти Дональд Трамп тадбиркор Илон Маск билан ўртасидаги келишмовчиликларга қарамай, уни ҳали ҳам дўсти деб ҳисоблашини маълум қилди.
Fox News телеканали орқали намойиш этилган қишлоқ хўжалигига бағишланган тадбирда сўзлаган Трамп, Маск билан муносабатлари яна яхшиланганини таъкидлади.
«Биласизми, Илоннинг оғир даврлари бўлган. Аммо ҳозир у яна менинг дўстим. Унинг 80 фоизи даҳолик, лекин 20 фоиз ҳолларда кичик муваффақиятсизликлар ҳам бўлиб туради. Лекин мен электр автомобилларини яхши кўраман», — деди Трамп.
Трамп ва Маск ўртасидаги можаро 2025 йил ёзида, Маск Ҳукумат самарадорлиги департаменти ташаббусидан кетганидан кейин бошланган эди. Ўшанда Маск АҚШ бюджети лойиҳасини танқид қилган, Трамп эса жавобан унинг компанияларини давлат шартномаларидан маҳрум қилиш билан таҳдид қилган.
Президент ва миллиардер сентябрь ойида консерватив фаол Чарли Кирк хотирасига бағишланган тадбирда жанжалдан кейин биринчи марта учрашган эди.
Декабрь ойида эса оммавий ахборот воситалари Маск Республикачилар партиясининг сайлов кампанияларини молиялаштиришни қайта бошлагани ҳақида хабар тарқатган.
Трампнинг сўнгги баёноти икки томон ўртасидаги муносабатлар яна тикланаётганидан дарак бермоқда.
2026 йил ёзда Марказий Осиё мамлакатларида аномал даражада кучли ёғингарчиликлар кузатилиши мумкин
Россия Молия вазирлиги ва Марказий банк Путинни огоҳлантирди
«Жуманжи» актёри ваҳшийларча ўлдирилди
