Савдо бошида Япониянинг Nikkei 225 индекси 7,6 фоизга, Жанубий Кореянинг КOSPI индекси 5 фоизга, Тайваннинг ТАIEX индекси 9,25 фоизга, Австралиянинг АСХ 200 индекси эса 4,6 фоизга кўтарилди.
Гарчи Вашингтон ва Пекин ўртасида савдо уруши давом этаётган бўлса-да, Хитой биржалари ҳам ўсмоқда. Шанхай биржаси SSE Shanghai Composite индекси очилишда 1,3 фоизга, Гонконгнинг Hang Seng индекси эса 3,08 фоизга ошди.
Аввалроқ АҚШ президенти Доналд Трамп Хитойдан импорт қилинадиган маҳсулотларга бож ставкаси 125 фоизга оширилишини эълон қилган. Пекин эса бунга жавобан тариф уруши доирасида Қўшма Штатлардан импорт қилинадиган маҳсулотларга 84 фоизлик бож жорий этди.
Шу билан бирга, Трамп 60 га яқин давлат учун импорт божлари жорий этилиши 90 кунга кечиктирилишини маълум қилди. Бу муддат ичида Хитойдан ташқари барча давлатларга нисбатан “асосий” 10 фоизлик бож амал қилиши белгиланди. Бундан ташқари, автомобил, пўлат ва алюминий импорти учун жорий этилган тарифлар ҳам сақланиб қолиши қайд этилди.
