Трамп “Тинчлик кенгаши” низомини имзолади

АҚШ президенти Доналд Трамп ўзи томонидан ташкил этилган янги халқаро тузилма — “Тинчлик кенгаши” низомини имзолади. Ҳужжатни имзолаш маросими Давосда бўлиб ўтаётган Жаҳон иқтисодий форуми доирасида ўтказилди.

Маросимда Яқин Шарқ ва Жанубий Америка мамлакатлари (Саудия Арабистони, Қатар, БАА, Аргентина, Парагвай) вакиллари, шунингдек, Ўзбекистон президенти Шавкат Мирзиёев, Қозоғистон президенти Қосим-Жўмарт Тўқаев, Венгрия бош вазири Виктор Орбан, Арманистон бош вазири Никол Пашинян, Озарбайжон президенти Илҳом Алиев ва бошқа давлат етакчилари иштирок этди.

CNN'нинг қайд этишича, саҳнада Трамп билан бирга 18 мамлакат вакиллари бўлган, аммо Қўшма Штатларнинг Ғарбий Европадаги анъанавий иттифоқчиларидан бирортаси ҳам қатнашмаган.

Трампнинг маросимдаги нутқида айтишича, “Тинчлик кенгаши” бошқа кўплаб халқаро ташкилотлар билан, жумладан БМТ билан ҳамкорлик қилади.

"Биз бутун дунёда тинчлик ўрнатмоқчимиз", — дея қўшимча қилди АҚШ президенти.