Трамп сиёсий маҳбусларни озод қилиш эвазига Россияга қарши санкцияларни юмшатиш ғоясини маъқуллади

Бу ҳақда The Atlantic хабар бермоқда.

Журналист Саймон Шустернинг сўзларига кўра, бундай схемани махсус вакил Жон Коул таклиф қилган. У Беларусда санкцияларни юмшатиш эвазига 500 га яқин сиёсий маҳбусни озод қилишга эришган.

Шу билан бирга, Вашингтон ва Минск Беларус калийсини сотиб олиш бўйича йирик келишувни муҳокама қилмоқда, бу ҳақда АҚШ президенти ўтган ҳафта маълум қилганди. Коулнинг сўзларига кўра, бу музокараларда Россия ҳам иштирок этмоқда — Европа санкциялари туфайли Беларус калийсини Россия ҳудуди орқали олиб чиқишга тўғри келади.

Коулнинг Москвага нисбатан режаси дастлабки босқичда бўлиб, Россия ва АҚШ ўртасидаги музокаралардаги боши берк кўчадан чиқишга қаратилган, деб ёзди Шустер. Журналистнинг фикрича, Владимир Путинда Украинага зарба беришни тўхтатмасдан туриб, америкаликлар билан муносабатларда яхши ният ва дипломатик тараққиёт белгиларини кўрсатишнинг оддий усули пайдо бўлади. Маҳбусларни озод қилиш эвазига Вашингтон Кремлга санкцияларни юмшатиш ва савдо келишувларига қайтишни таклиф қилиши мумкин.

Коулнинг фикрича, бундай келишувлар тинчликка ҳисса қўшади, чунки иқтисодий алоқалар одатда нормаллашувга олиб келади. Украина бу оптимизмга қўшилмайди: президент Володимир Зеленский The Atlantic журналистига уруш тугагунга қадар Россияга нисбатан санкцияларни бекор қилиш бўйича ҳар қандай уринишни тўсиб қўйиш учун қўлидан келган барча ишни қилишини айтди.

Кремл билан музокараларда Беларус тажрибасини қўллашни Коулга “Новая газета”нинг собиқ бош муҳаррири ва Тинчлик бўйича Нобел мукофоти совриндори Дмитрий Муратов таклиф қилди — у Шустердан ўзини президентнинг махсус вакили билан таништиришни сўради.

Коулда аллақачон Вашингтон келажакдаги музокараларга киритиши мумкин бўлган, Россия қамоқхоналаридаги америкаликлар рўйхати мавжуд. Муратов билан биргаликда у россиялик сиёсий маҳбуслар, журналистлар ва урушга қарши позицияси учун ҳукм қилинганларнинг алоҳида рўйхатини тузди. Аниқ исмлар ва АҚШ томонидан қилиниши мумкин бўлган ён босишлар ҳозирча ошкор этилмаган.