Трамп Россия, Хитой ва КХДРни АҚШга қарши фитна режалаштиришда айбламоқда

АҚШ президенти Пекинда ўтган парад фонида кескин баёнот берди.

АҚШ президенти Доналд Трамп Пекинда Иккинчи жаҳон урушида ғалабанинг 80 йиллиги муносабати билан ўтказилган тантанали ҳарбий парад фонида Россия, Хитой ва КХДРни Америка Қўшма Штатларига қарши “фитна” уюштиришда айблади.

Трамп Truth Social ижтимоий тармоғида Хитой раҳбари Си Сзинпинга мурожаат қилиб, “Президент Владимир Путин ва Ким Чен Ин билан АҚШга қарши фитна режалаштираётганингизда, уларга менинг энг илиқ тилакларимни етказинг”, дея ёзди. Бироқ у бу баёнот билан айнан нимани назарда тутганини очиқламади.

Шунингдек, АҚШ президенти Америка Иккинчи жаҳон уруши йилларида Хитойга озодлик учун курашда ёрдам берганини эслаб ўтди. “Кўплаб америкаликлар Хитойнинг ғалабаси ва шарафи йўлида жон фидо қилди. Умид қиламанки, улар муносиб равишда ёдга олинади ва қадрланади”, — деди Трамп.

Шу билан бирга, бир неча соат олдин Трамп журналистларга берген интервьюсида Россия ва Хитойнинг АҚШга қарши “ўқ” шаклланишидан қўрқмаслигини билдирди. “Бизда бугунги кунда дунёдаги энг кучли қуролли кучлар мавжуд. Улар бизга қарши армияларини ҳеч қачон ишлатмайди. Ишонинг, бу уларнинг энг катта хатоси бўлган бўларди”, — дея таъкидлади Трамп.