Трамп Nvidia раҳбарининг хитойлик жосус аёл билан ишқий муносабати ҳақида гапирди

"Женсен Ҳуанг ўша аёл жосус эканини билмаган": Трамп Nvidia раҳбарининг хитойлик жосус аёл билан ишқий муносабати ҳақида гапирди.

Аввалроқ Nvidia компанияси бош директори Женсен Ҳуанг рафиқасига хиёнат қилганини тан олиб, ундан ва компания ходимларидан узр сўраганди. Nvidia эса ҳолат юзасидан мустақил текширув бошлаган. Трамп журналистларга Ҳуангга қўнғироқ қилиб, унинг ҳол-аҳволини сўраганини айтди.

"Ҳуанг “Ўша аёл жосус эканини хаёлимга ҳам келтирмаганман”, деди ва мен унга чиндан ҳам ишонаман. Мен бундан ҳайратдаман, чунки уни доим юксак ахлоқий фазилатларга эга инсон деб билардим. У ажойиб инсон. Умид қиламанки, мазкур можаро унга муаммо туғдирмайди", — деди Трамп.

Президент, шунингдек, Федерал тергов бюроси (ФТБ) ушбу иш тафсилотларини текшираётганини маълум қилди.

Женсен Ҳуанг хорижий разведка хизматининг нишонига айланган бўлиши мумкин. У билан ишқий муносабатда бўлгани айтилаётган Мегаспеед компанияси раҳбари Элис Ҳуанг Хитой фойдасига жосуслик қилиш, шунингдек, АҚШнинг Хитойга сунъий интеллект чипларини етказиб беришга қўйган тақиқларини четлаб ўтишга уриниш учун ёлланганликда гумонланмоқда. АҚШ махсус хизматлари аёл устидан камида бир йил давомида электрон кузатув олиб борган.

Ўз навбатида, Хитой Ташқи ишлар вазирлиги Nvidia раҳбари атрофидаги жосуслик айбловларини туҳмат деб атади.