Трамп Нобел мукофотини олмагани учун “фақат тинчлик ҳақида ўйлашга” мажбур эмаслигини айтди

АҚШ президенти Доналд Трамп Норвегия бош вазири Йонас Гар Стёрега мактуб йўллаб, ўзига тинчлик бўйича Нобел мукофоти берилмагани сабабли, энди тинчлик ҳақида қайғуришга мажбур эмаслигини айтди.

"Ҳурматли Йонас! Мамлакатингиз саккиз ва ундан ортиқ урушнинг олдини олганим учун менга тинчлик бўйича Нобел мукофотини бермасликка қарор қилганини ҳисобга олсак, мен энди фақат тинчлик ҳақида қайғуриш мажбуриятини ҳис қилмайман, гарчи у ҳар доим устувор бўлса-да, энди мен Америка Қўшма Штатлари учун нима яхши ва тўғри эканини ўйлашим керак. Дания бу ерни Россия ёки Хитойдан ҳимоя қила олмайди ва нега уларда мулк ҳуқуқи бўлиши керак? Бу ҳақда ҳеч қандай ёзма ҳужжат йўқ, фақат у ерга юз йиллар олдин қайиқ сузиб борган, лекин бизнинг қайиқлар ҳам борган. Мен NATO учун у ташкил этилганидан бери бошқалардан кўра кўпроқ иш қилдим ва энди NATO Қўшма Штатлар учун нимадир қилиши керак. Агар биз Гренландияни тўлиқ ва буткул назорат қилмасак, дунё хавфсиз бўлмайди", — деб ёзган Оқ уй раҳбари.

Ушбу хат Европа давлатларининг Вашингтондаги элчиларига йўлланган, улардан Трампнинг Норвегия бош вазирига йўллаган мактубини ўз ҳукумати раҳбарларига етказиш сўралган.

Йонас Гар Стёре бу мактубни 18 январ куни Трампдан олганини тасдиқлади. Норвегия бош вазири сўзларига кўра, мактуб шу куниёқ АҚШ президентига ўзи ва Финляндия президенти Александр Стубб номидан юборган қисқа хабарига жавобан келган. Стёре ва Стубб Трампнинг Европанинг саккизта давлатига қарши божлар жорий этиш таҳдиди бўйича ўз позицияларини баён қилган ва телефон орқали суҳбат ўтказишни сўраган.