Трамп келаси ҳафта Байден билан учрашиши мумкин

АҚШ етакчиси Жо Байден ва АҚШнинг сайланган президенти Дональд Трамп ўртасидаги учрашув келаси ҳафта бўлиб ўтиши мумкин.

Бу ҳақда CNN телекомпанияси маълум қилди.

Манбага кўра, сайланган президентнинг жамоаси Трамп Вашингтонга Американинг амалдаги раҳбари билан учрашиш учун қачон бориши кераклигини муҳокама қилмоқда. Республикачиларнинг яқинлари учрашув имкон қадар тезроқ, келаси ҳафтада бўлиб ўтишига умид қилмоқда.

Аввалроқ Оқ уй Байден Трамп билан суҳбатда “ҳокимиятнинг силлиқ ўтишини таъминлашга содиқлигини таъкидлаган” ҳамда уни Оқ уйдаги учрашувга таклиф қилгани, учрашув санаси кейинроқ аниқланадиганини маълум қилганди.

АҚШ сайловларида овоз бериш 6 ноябрь куни эрталаб якунланди. Расмий натижалар ҳали якунлангани йўқ, бироқ Fox News телеканалига кўра, Трамп ҳозирда керакли 270 овоз билан 295 сайловчилар овозини қўлга киритган. Унинг ўзи аллақачон ўзини АҚШнинг 47-президенти деб эълон қилган. АҚШ Конгресси Вакиллар палатаси спикери, республикачи Майк Жонсон уни сайланган давлат раҳбари деб атади.