Трамп iPhone АҚШда ишлаб чиқарилишини хоҳламоқда

АҚШда iPhone’ни маҳаллий ишлаб чиқаришни йўлга қўйиш учун барча зарур ресурслар ва малакали ишчи кучи мавжуд, деди Оқ уй матбуот котиби Каролин Ливитт.

- Мутлақо. Унинг (президент Доналд Трампнинг) фикрича, бизда ишчи кучи бор, бизда меҳнат ресурслари бор, бизда мамлакат ичида (iPhone) ишлаб чиқариш учун зарур бўлган ҳамма нарса бор," - деди Ливитт журналистларга.

Америкаликлар президент маъмуриятининг савдо божлари туфайли Хитойда ишлаб чиқарилган маҳсулотлар нархи ошишидан қўрқиб, Apple маҳсулотларини, жумладан, iPhone’ни фаол сотиб ола бошлади, деб ёзади Bloomberg.

Агентликнинг тушунтиришича, Apple’нинг энг кўп сотилган маҳсулоти бўлган iPhone’нинг аксарияти Хитойда ишлаб чиқарилади.

Трампнинг божлар ҳақидаги баёнотидан кейин бошланган Америка фонд бозорининг қулаши Apple’га айниқса қаттиқ зарба берди. Ўтган ҳафтада компаниянинг бозор капиталлашуви 500 миллиард доллардан кўпроққа тушиб кетди.