Трамп Ғазодаги уруш тез орада якунланишини ваъда қилди

АҚШ президенти можарони яқин орада тугашини кутмоқда, бироқ Исроил ҳали ҳам сулҳ режасини рад этмоқда.

АҚШ президенти Дональд Трамп Оқ уйда берган баёнотида Ғазодаги уруш икки-уч ҳафта ичида якунланишини айтди. "Ўйлайманки, яқин икки-уч ҳафта ичида анча яхши, якуний ечим бўлади", — деди у, бу прогнозининг асосларини очиқламасдан.

АҚШ раҳбари урушнинг “очлик ва ўлимлар” туфайли тўхтатилиши зарурлигини таъкидлади.

Трамп АҚШнинг "жиддий дипломатик ҳаракатлари"ни эслатиб ўтди, бироқ Исроил ҲАМАС томонидан таклиф қилинган сўнгги режани — 60 кунлик ўт очишни тўхтатиш ва 10 нафар гаровдаги шахсни озод қилиш режасини қабул қилмаганини маълум қилди. Бунинг ўрнига Тел-Авив Ғазо шаҳрини босиб олишга тайёргарлик кўрмоқда, бу эса бир неча ой давом этиши мумкин.

Айни пайтда Ғазо сектори оғир гуманитар инқироз ҳолатида қолмоқда. Исроил томонидан қўйилган блокада ва тинимсиз бомбардимонлар очлик, ичимлик суви, дори-дармон ва гигиена воситаларининг танқислигига олиб келди. 2023-йил 7-октябрдан буён Исроил тажовузи натижасида ҳалок бўлганлар сони 62 744 кишига, яраланганлар эса 158 259 кишига етди, уларнинг аксарияти аёллар ва болалардир.