Трамп: Ғазодаги уруш Исроилга зарар етказмоқда

АҚШ президенти Исроилнинг жамоатчилик фикри майдонида ютқазганини тан олди ва Нетаньяхуни урушни тугатишга чақирди.

АҚШ президенти Дональд Трамп таъкидлашича, Исроил Ғазодаги урушда, эҳтимол, ҳарбий жиҳатдан ютяпти, бироқ жамоатчилик фикрида ютқазмоқда. У бу фикрни Daily Caller нашрига берган интервьюсида айтди. Ушбу тезис Трампнинг ўтган йилги сайловолди кампаниясида эшитилган эди, лекин у январда Оқ уйга қайтганидан бери бу ҳақда очиқ гапирмаган.

«Улар бу урушни тугатишлари керак... Бу Исроилга зарар келтиряпти», — деди Трамп ва у Ғазо шаҳрини оккупация қилиш режасини қўллаб-қувватлашини таъкидлади.

🇺🇸 АҚШда, жумладан, Республикачилар партияси ичида ҳам Исроилга нисбатан қўллаб-қувватлаш пасайиб бораётгани ҳақидаги саволга Трамп: «Мен бу ҳақда биламан», — деб жавоб берди. У 15–20 йил олдин Исроилнинг Конгрессда энг кучли лоббиси бўлганини, ҳатто у ердаги назоратни тўлиқ ўз қўлида ушлаганини қайд этди, бироқ ҳозирги вазият кескин ўзгарганини айтди.

«Бор вақтларда агар сиз сиёсатчи бўлишни истасангиз, Исроил ҳақида ёмон сўз айтишингиз мумкин эмасди. [...] Уларнинг лоббиси мен кўрганлар ичида энг кучлиси эди... Улар Конгрессни тўлиқ назорат қиларди», — деди у.

2024 йил апрель ойида ҳам Дональд Трамп Исроилнинг Ғазодаги уруш олиб бориш услубини танқид қилган ва унинг пиар (PR) соҳасида ютқазаётганини таъкидлаган эди. У урушни тезда тугатиш ва тинчликка қайтишни таклиф қилган.

Шунингдек, у Исроил томонидан эълон қилинган Ғазодаги вайрона ва қурбонликлар акс этган кадрлар ҳақида шундай деган:

«Бу тасвирлар энг ғамгин, энг даҳшатли кадрлар. Менимча, уларни (Исроилни) кучли кўрсатмайди. Улар пиар урушда ютқазмоқда. Жуда катта ютқазмоқда».