Трамп: "Ғазодаги можаро 2-3 ҳафта ичида ҳал бўлади"

АҚШ президенти Дональд Трамп Ғазо секторидаги можаро икки-уч ҳафта ичида ниҳоят ҳал этилишига ишонмоқда.

У бу ҳақда Оқ уйда Жанубий Корея президенти Ли Чже Мён билан учрашуви аввалида журналистлар саволларига жавоб бериш чоғида айтиб ўтди.

"Ўйлайманки, яқин икки-уч ҳафта ичида биз можаро бўйича яхши, якуний хулосага келамиз”, деди Трамп. "Бу ҳақда гапириш қийин, чунки улар минг йиллар давомида курашиб келишган, бу ер доимо кескинлик ўчоғи бўлган".

Эслатиб ўтамиз, 18 март куни Исроил армияси Ғазо секторида ҳарбий амалиётларни давом эттириб, анклавга катта зарбалар бериб, январь ойида ўрнатилган сулҳни бузган эди. Исроил бош вазири Беньямин Нетаньяхунинг идораси буни Фаластиннинг ҲАМАС радикал ҳаракати воситачилар ва АҚШ президентининг махсус вакили Стивен Уиткофф томонидан илгари сурилган таклифларни қабул қилишдан бош тортгани билан изоҳлаб, сектордаги операциядан мақсад барча гаровга олинганларни озод қилиш эканини айтди. Радикаллар жанговар ҳаракатлар қайта бошланганида Исроил ва АҚШни айблади.

8 август куни Исроил ҳарбий-сиёсий вазирлар маҳкамаси бош вазир Беньямин Нетаньяху таклиф қилган Ғазо шаҳри ҳудудини бутун назоратга олиш ва Фаластин анклавидаги операцияни кенгайтириш режасини маъқуллади. 20 август куни Исроил Мудофаа вазири Исраэль Кац ушбу режани тасдиқлади.