Трамп: "ЕИ етакчилари Украинадаги можарони ҳал қилиш учун Путинга қўнғироқ қилишимни сўрашди"

АҚШ президенти Дональд Трампнинг маълум қилишича, Европа Иттифоқи етакчилари ундан Украинадаги можарони ҳал қилиш учун Россия президенти Владимир Путин билан боғланишни сўраган, чунки Путин уларнинг қўнғироқларига жавоб бермаган. Бу ҳақда РИА Новости хабар бермоқда.

Яқинда Россия президентининг матбуот котиби Дмитрий Песков тўғридан-тўғри музокаралар ташаббуси Киевдан чиқиши кераклигини таъкидлади, бироқ Москва бу йўналишда ҳеч қандай ҳаракат кўрмади. Песков, шунингдек, Владимир Путин АҚШ президентининг махсус вакили Стивен Уиткофф билан учрашувда Россиянинг Украина билан ҳеч қандай шартларсиз музокара олиб боришга тайёрлигини тасдиқлаганини ҳам эслатиб ўтди.

Трамп аввалроқ Россия можарони ҳал қилиш бўйича келишувга эришишга тайёр, деб ҳисоблашини, бироқ ҳозирча Киев билан келишувга эриша олмаганини айтган эди.