Трамп Давлат департаменти бюджетини деярли 50 фоизга қисқартиришни режалаштирмоқда

АҚШ президенти Дональд Трамп маъмурияти Давлат департаментига ажратиладиган бюджет маблағларини деярли ярмига қисқартиришни режалаштирмоқда.

Бу ҳақда The Washington Post нашри департаментнинг ички ҳужжатига таяниб хабар берди.

Ўтган ҳафта эълон қилинган ички эслатмага кўра, Трамп маъмурияти Давлат департаменти бюджетини ва АҚШ Халқаро тараққиёт агентлиги (USAID)нинг қолган қисмини гуманитар ёрдам, глобал соғлиқни сақлаш ва халқаро ташкилотларга ажратиладиган маблағни деярли ярмига қисқартиришни таклиф қилган, дея таъкидлайди газета.

Унга кўра, Оқ уй Давлат департаменти ва USAID фаолиятига 28,4 миллиард доллар ажратишни таклиф қилмоқда, бу Конгресс томонидан 2025 йил учун маъқулланган маблағдан 27 миллиард доллар ёки 48 фоизга кам.

Шу билан бирга, халқаро ташкилотларга ажратиладиган маблағлар миқдори янада кўпроқ – қарийб 90 фоизга қисқартирилади. Тинчликни сақлаш амалиётларини, БМТ, НАТО ва бошқа 20 та халқаро институтларни молиялаштириш тўхтатилади – у фақат бир нечта ташкилотлар, жумладан, Атом энергияси бўйича Халқаро агентлик ва Халқаро фуқаро авиацияси ташкилоти учун сақланиб қолади. Бундан ташқари, бюджетда алоҳида иттифоқчилар, жумладан Исроил ва Миср қуролли кучларини ривожлантириш учун 5,1 миллиард доллар миқдоридаги анъанавий грантлар сақланиб қолади.

Нашр таъкидлаганидек, таклиф этилган қисқартиришлар Республикачилар партияси ҳар икки палатада ҳам кўпчиликни ташкил этган Конгресс томонидан маъқулланадими ёки йўқми, ҳозирча ноаниқ қолмоқда.

Вашингтон Пост газетаси, шунингдек, АҚШ Давлат котиби Марко Рубио департамент харажатларини қисқартириш бўйича ўз режасини ишлаб чиқаётганини таъкидлайди. Газетанинг манбаларига кўра, унда Давлат департаментининг 80 минг нафар ходимидан ўн минглаб ходимлари ишдан бўшатилиши, шунингдек, бир қанча консулликлар, дипломатик департаментнинг айрим бўлимлари ва дастурлари ҳамда бошқа объектларнинг ёпилиши кўзда тутилган.