Трамп АҚШда iPhone ишлаб чиқаришни талаб қилди

АҚШ президенти Доналд Трамп Apple бошқарувчиси Тим Кукдан Америка бозори учун қурилмалар ишлаб чиқарадиган заводларни Ҳиндистонда қуришни тўхтатишни талаб қилганини маълум қилди. У бу ҳақда Қатарга ташрифи пайтида айтиб, Apple АҚШдаги ишлаб чиқаришни кенгайтириши лозимлигини таъкидлади. "Мен унга: Ҳиндистонда қурманг, дедим," - дея Трамп Кук билан суҳбатини келтирди.

Ушбу баёнот Apple’нинг режаларига таҳдид солмоқда. Компания 2026 йил охиригача АҚШга кўплаб iPhone’ларни Ҳиндистондан импорт қилишни режалаштирган эди. Бу орқали тарифлар ва геосиёсий хатарлар фонида Хитойга қарамликни камайтирмоқчи эди. Ҳозирда Apple деярли барча iPhone’ларни Хитойда ишлаб чиқаради ва 2029 йилгача Америка иқтисодиётига 500 миллиард доллар киритишга ваъда берган бўлса-да, АҚШда йиғиш линияларига эга эмас.

Ишлаб чиқаришни АҚШга кўчириш мураккаб жараён: таъминот занжири ва малакали ишчи кучи асосан Хитойда тўпланган, Ҳиндистонда эса Apple эндигина ҳамкорлик алоқаларини ўрнатмоқда. АҚШдаги юқори меҳнат ва ишлаб чиқариш харажатлари бу лойиҳани иқтисодий жиҳатдан мақсадга номувофиқ қилади.