DW нашрининг хабар беришича, АҚШ президенти Доналд Трамп мамлакатда марказий банк функцияларини бажарувчи Федерал захира тизими (ФЗТ) бошқарувчиларидан бири Лиза Кукни лавозимидан бўшатиш қарорини эълон қилди. Президент бу ҳақдаги хатни Кукка йўллади ва Truth Social ижтимоий тармоғида ҳам эълон қилди. Бу ҳодиса Қўшма Штатлар президенти 111 йиллик тарихда илк бор марказий банк бошқарувчисини ишдан бўшатишга уриниши ҳисобланади.
Трамп Кукнинг “ишдан бўшатилишига асосли сабаб” сифатида ҳуқуқ-тартибот идоралари унинг “бир ёки бир нечта ипотека битимларида ёлғон маълумот бергани” ҳақидаги хабарларни кўрсатган.
Ўз навбатида, Лиза Кук истеъфога чиқмаслигини эълон қилди. "Президент Трамп мени “асосли сабаб билан ишдан бўшатгани” ҳақида маълум қилди, аммо қонун бўйича бундай сабаб йўқ ва уни мени лавозимимдан озод қилишга ваколати ҳам йўқ. Мен истеъфога чиқмайман. 2022 йилдан бери қилаётганимдек, АҚШ иқтисодиётини қўллаб-қувватлашдаги вазифаларимни давом эттираман", — деди ФЗТ бошқарувчиси.
Трамп узоқ вақтдан бери Қўшма Штатларнинг мустақил марказий банки ҳисобланувчи ФЗТни фоиз ставкаларини пасайтиришни кечиктиришда айблаб келади. Яқинда Кук Трамп ва унинг маъмурияти томонидан “ипотека кредитлари бўйича фирибгарлик” даъволари билан ҳам танқид қилинган эди.
АҚШ Адлия вазирлиги бу айбловларни текширишни режалаштираётганини маълум қилган, аммо ҳозирча Кукка нисбатан ҳеч қандай расмий айблов қўйилмаган.
Кейинги 5 йил ичида бошланиши мумкин бўлган 5 та уруш
АҚШ Конгрессига номзод Валентина Гомес Қуръонни ёқиб юборди
Ҳиндистон ташқи ишлар вазири Ғарбни "агар ёқмаса" нефтни сотиб олмасликка чақирди
