Тошкентдаги Бўрижар каналида 43 ёшли фуқаро икки қизчани қутқариш учун сувга тушиб, ўзи ҳалок бўлди

5 май куни Тошкентдаги Бўрижар каналида 43 ёшли Абдуманноп Самиқов икки қизчани қутқариш учун сувга тушиб, ўзи ҳалок бўлди.

Қизлардан бирининг ҳикоясига кўра, дугонаси канал четига яқинлашиб, оёқларини сувда ҳўллаб олиш учун қирғоққа яқинлашганда, тасодифан каналга тушиб кетган. Дугонаси уни қутқаришга уринади, лекин уни ҳам оқим олиб кетади.

Қизлар ёрдам сўраб бақирган, шундан сўнг яқинда бўлган Абдуманноп Самиқов уларни қутқариш мақсадида сувга тушган. Бироқ канал қирғоғи бетон билан қоплангани, ҳеч қандай таянч ёки чиқиш имконияти бўлмагани боис, у сувдан чиқолмай, ҳалок бўлган.

“Уни канал эмас, балки шу каналдан қилинган нарса ўлдирди”

Марҳумнинг рафиқаси Сурайё Маҳкамованинг таъкидлашича, Самиқов сузишни яхши билгaн ва табиий ҳолатда у осонликча чиқиб кетган бўларди:

“Агар у ерда бирор осилиб чиқадиган нарса бўлганида, у албатта омон қоларди. Илгари бу ерда дарахтлар, тупроқ бор эди — у илдизларга ёпишиб, ўзини сақлаб қоларди. Энди эса фақат бетон. Уни канал эмас, балки шу каналдан қилинган нарса ўлдирди”, — дейди у.

Бош прокуратура ҳолат юзасидан Ўзбекистон ЖКнинг 25 ва 97-моддалари билан жиноят иши қўзғатганини ва терговгача текширув ишлари олиб борилаётганини маълум қилди.