Тошкентда уй таъмири пайтида ертўладан қурол ва ўқ-дорилар топилди

Тошкентда эркак ўз ихтиёри билан ўқотар қурол ва 1600 дан ортиқ ўқ-дориларни топширди, деб хабар бермоқда ИИВ матбуот хизмати.

Эркак Тошкент шаҳар ИИББга қўнғироқ қилиб, уйни таъмирлаш чоғида ертўладан қурол ва ўқ-дориларни топиб олганини ва уларни ўз ихтиёри билан ички ишлар органларига топшириш ниятида эканлигини маълум қилган.

Мурожаат асосида тезкор бўлинмалар ходимлари фуқаронинг яшаш хонадонини кўздан кечириб, ертўладан РГД-5 русумли қўл гранатаси, TOZ-8 ва IJ-27Е русумли ўқотар қуроллар, портлатиш мосламаси, қўл граната запаллари, электродетонатор, 500 дан ортиқ жанговар ўқ-дорилар ҳамда бошқа буюмларни аниқлади.

Маълум бўлишича, мазкур қурол ва ўқ-дорилар фуқаронинг марҳум отасига тегишли бўлиб, у илгари Мудофаа вазирлиги тизимида хизмат қилган ва Қуролли Кучлар академиясидан нафақага чиққан.

ИИВ эслатишича, қурол, ўқ-дори ва портловчи моддаларни ихтиёрий равишда топширган шахслар жавобгарликка тортилмайди. Бироқ бундай буюмларни қонунга хилоф равишда сақлаш ёки топширишдан бош тортиш ҳолатлари аниқланса, Жиноят кодексининг 248-моддасига асосан жиноий жавобгарлик белгиланган.