«Тошкент-Самарқанд» тезюрар поезди қатнов вақтини 1,5 соатгача қисқартиради

Тошкент ва Самарқанд ўртасидаги янги тезюрар темир йўли қатнов вақтини 1,5 соатгача қисқартиради. Бу ҳақда «Spot» нашри Транспорт вазирлигининг тақдимотига таяниб хабар бермоқда.

Транспорт вазири ўринбосари Жасурбек Чориев ўз нутқида лойиҳанинг техник-иқтисодий асослари грант ажратган Корея Эксимбанки кўмагида ишлаб чиқилганини таъкидлади. Яқинда харид қилинган 6 та Hyundai Rotem поездлари шу йил охиридан бошлаб етказиб берилади, кейинги йил бошидан эса йўловчиларга хизмат кўрсата бошлайди.

«Ўзбекистонда мавжуд темир йўлларининг транзит салоҳияти чекланган, чунки [йўловчи ташишдан ташқари] мамлакат орқали ўтадиган юк ташувлари ҳам мавжуд. Битта линиядан бир вақтнинг ўзида юк ва йўловчи ташишда фойдаланиш имконсиз, биз уни янада кенгайтира олмаймиз. Албатта, биз операцион жараёнларни оптималлаштиряпмиз, лекин шу билан бирга, махсус тезюрар темир йўл линиясини қуриш муҳим», – деган Чориев.

Унинг сўзларига кўра, тезюрар темир йўл Тошкентнинг янги халқаро аэропортини боғлаб, Самарқандга етиб боради.

Маълум қилинишича, 24 октябр куни Жанубий Кореянинг «Saman Engineering» компанияси Транспорт вазирлиги, Ўзбекистон темир йўллари ва бошқа идоралар таклифлари асосида Тошкент-Самарқанд тезюрар темир йўлининг 3 та вариантини тақдим этган.

Биринчи вариантда темир йўл узунлиги 282 км, ҳаракат вақти 1 соат 26 дақиқа, ўртача тезлик 185,7 км/соатни ташкил этади. Умумий узунлиги 8,9 км бўлган 74 та кўприк ва 3 та туннел қурилиши кўзда тутилган.

Иккинчи вариантда магистралнинг узунлиги 291,7 км. Бунда ўртача тезлик 179,4 км/соатгача пасаяди, йўлга сарфланадиган вақт эса 1 соат 33 дақиқагача ортади. Лойиҳа доирасида 82 та кўприк ва 16 км узунликдаги 1 та туннел қурилади.

Учинчи вариантда юқори тезликдаги темир йўлнинг узунлиги 302 км.дан ортиқ. Ўртача тезлик 166,9 км/соат бўлганда Тошкентдан Самарқандгача бўлган масофа 1 соат 45 дақиқа давом этади. Йўналиш умумий узунлиги 9,6 км бўлган 105 та кўприк ва 2 та туннелни ўз ичига олади.

Эслатиб ўтамиз, жорий йилнинг февралида Транспорт вазирлиги Жанубий Корея компаниялари концорциуми билан Тошкент-Самарқанд тезюрар темир йўлини қуриш лойиҳасининг техник-иқтисодий асосларини ишлаб чиқишни бошлашга келишиб олганди. Корея Эксимбанки бунинг учун грант ажратади.

Лойиҳага, жумладан, темир йўлни молиялаштиришга Хитой Эксимбанки ва Европа инвестиция банки қизиқиш билдирган.