Тошкент метроcида 9 декабрдан 16 та касса ёпилади

Тошкент метрополитенида 2025 йил 9 декабрдан бошлаб жами 16 та касса фаолияти тўхтатилади. Бу чоралар тўлов тизимида шаффофликни ошириш, хизмат кўрсатиш сифатини яхшилаш ва электрон тўловларни кенгайтириш мақсадида кўрилмоқда.

Кассалар “Ер устки ҳалқа йўли” йўналишидаги барча 14 та бекатда, шунингдек “Пахтакор” ва “Алишер Навоий” бекатларида ёпилади.

Уларнинг ўрнига йўловчилар учун замонавий QR-кодли чипталар берувчи инфокиоскалар ўрнатилди.

Инфокиоскалар афзалликлари:

• Нақд пулга боғлиқликни камайтиради, тўлов жараёнини янада шаффоф ва хавфсиз қилади;
• Чипта харид қилиш жараёнини тезлаштиради ва навбатларни қисқартиради;
• QR-кодли чиптани мобил телефон орқали ёки қоғозга чиқарилган квитанция кўринишида қўллаш имконини беради.