Тошкент аэропортида электр узилиши бўйича расмий муносабат берилди

Бугун соат 02:20 да 220/110/35/6 кВ «Қўйлиқ» подстанциясидан чиқувчи, «Uzbekistan Airports» тасарруфидаги 35 кВли «Аэропорт–5» юқори кучланишли тармоқда носозлик юзага келган.

Натижада Тошкент халқаро аэропортида электр энергияси таъминотида қисқа муддатли узилиш қайд этилган. Айни пайтда «Ҳудудий электр тармоқлари» АЖга қарашли барча тармоқлар соз ҳолатда бўлган.

Соат 02:49 да аэропорт истеъмолчиси захира тармоқлари орқали электр энергияси билан қайта таъминланган.

«Uzbekistan Airports» расмий хабарига кўра, ушбу узилиш самолётларнинг учиши ва қўнишига таъсир қилмаган, барча хизматлар одатий режимда фаолият юритган.