Абу-Дабида Барқарор ривожланиш ҳафталиги саммити бошланди, унда биринчи жаҳон етакчиси Қозоғистон Президенти Қосим-Жомарт Тоқаев сўзга чиқди. У асосий муаммолар ва ташаббусларни таъкидлаб, барқарор ривожланиш истиқболларини тақдим этди.
"Дунё бўйлаб энергия тизимлари иссиқхона газлари чиқиндиларининг 75 фоизини ва биологик хилма-хилликнинг йўқолишининг 10 фоизини ташкил қилади", деди Тоқаев ўз нутқида.
Президент яшил энергия лойиҳаларини амалга оширишда Қозоғистонни хорижий ҳамкорлар томонидан қўллаб-қувватлаш муҳимлигини таъкидлади.
“Умумхалқ референдумида қўллаб-қувватланган биринчи атом электр стансиямиз қурилиши мамлакат энергетика соҳасини барқарор ривожлантириш йўлидаги муҳим қадам бўлади”, — деди Тоқаев.
Президент Қозоғистоннинг Евроосиёдаги транспорт хаби сифатидаги стратегик ролини белгилаб берди. Унинг сўзларига кўра, мамлакат йўллар, аеропортлар ва денгиз портларига фаол сармоя киритмоқда. Шунингдек, у Транскаспий йўлаги ва Шимолий-Жануб йўналишини ривожлантириш режаларини қайд этди, бу эса Қозоғистоннинг “Бир камар, бир йўл” ташаббусидаги ролини кучайтиради.
Тоқаев глобал исишни Марказий Осиё учун асосий муаммолардан бири деб атади. У эрта огоҳлантириш тизимларини яратиш, ирригация тизимларини модернизация қилиш ва сувни тежайдиган технологияларни жорий этишни таклиф қилди. Президент табиий ресурсларни бошқаришда сунъий интеллект ва сунъий йўлдош мониторингидан фойдаланиш муҳимлигини ҳам таъкидлади.
Президент Тоқаев яшил молиянинг мавжудлиги, технология ва тадқиқотлар соҳасида халқаро ҳамкорликни мустаҳкамлаш, иқлим, иқтисодий ва технологик устуворликлар синергиясига асосланган глобал ривожланишнинг янги парадигмасини таклиф қилди. Унинг фикрича, бу ёндашувлар глобал муаммоларни самарали ҳал этишнинг яхлит тизимини шакллантириш имконини беради.
РФ учун яна бир “бош оғриқ” пайдо бўлди
Дания АҚШ тажовузи бўлса, Россияга мурожаат қилишни таклиф қилди
Москва АҚШга "жавоб" ваъда қилмоқда
