The Washington Post: Трамп Маск билан зиддиятдан сўнг уни «катта гиёҳванд» деб атади

The Washington Post нашри ўз манбаларига таяниб ёзишича, АҚШ президенти Доналд Трамп Илoн Маск билан содир бўлган шов-шувли зиддиятдан кейин шахсий суҳбатларда уни «катта гиёҳванд» деб атаган. Бундан бироз аввалроқ эса Маск АҚШ молия вазири Скотт Бессент билан тортишиб кетган, иш ҳатто муштлашувгача борган.

Газетанинг ёзишича, Трамп «дунёдаги энг бой одам» билан оммавий зиддият ортидан тушкунликка тушган ва Маскнинг позициясини тушунишга уриниб, танишларига қўнғироқ қилган ва у билан нима содир бўлаётганини сўрай бошлаган.

Оқ уй вакилларининг таъкидлашича, Трампнинг Маск наркотик моддалар истеъмол қилаётган бўлиши мумкинлиги ҳақидаги хавотири «уларнинг муносабатларидаги узоқлашув сабабларидан бирига» айланган.

“Пайшанба кунги тортишувдан сўнг президент атрофидаги одамлардан вазиятни янада кескинлаштирмасликни сўраган, вице-президент Жей Ди Вэнсни эса омма олдида Маск ҳақида гап борганда эҳтиёткорлик билан ёндашишга чақирган”, деб ёзади газета ўз манбаларига таяниб.

The Washington Post шунингдек, Маск ва Трамп маъмурияти ўртасидаги муносабатларнинг кескинлашишига олиб келган, апрель ойи ўрталарида юз берган яна бир воқеани келтириб ўтади. Унга кўра, ўшанда Овал кабинетдаги учрашувдан сўнг Маск ва молия вазири Бессент давлат амалдорларидан бирининг тайинлови борасида келиша олмаган. Улар бир-бирига нисбатан ҳақоратли сўзлар ишлатиб, тортишиб кетган.

«Шундан сўнг Маск, худди регби ўйинчисига ўхшаб, Бессентни елкаси билан кўкрак қисмига уриб юборди. Бессент эса жавоб зарбаси тариқасида унга мушт туширди. Бир неча киши уларни ажратиш учун аралашишга мажбур бўлдилар», — деб ёзади нашр Трампнинг собиқ маслаҳатчиси Стив Бэннонга таяниб.