Технологик металлар: Ўзбекистоннинг халқаро бозордаги ўрни мустаҳкамланмоқда

Канаданинг Торонто шаҳрида дунё миқёсидаги энг нуфузли тадбирлардан бири — Халқаро тоғ-кон саноати конференцияси бўлиб ўтмоқда. Унда дунёнинг 135 дан ортиқ мамлакатларидан 27 мингдан ортиқ минерал ресурслар соҳасидаги етакчи мутахассислар, инвесторлар ва йирик компаниялар иштирок этиб, иштирокчилар қаторидан Ўзбекистон технологик металлар комбинати ҳам ўрин олган.

Анжуманнинг алоҳида эътиборга молик жиҳати унда “Ўзбекистон куни”нинг ўтказилиши бўлди. Бу ташаббус мамлакатимизнинг саноат салоҳиятини, айниқса, технологик металлар ва нодир ер элементлари соҳасидаги имкониятларини халқаро майдонда кенг тарғиб этишга қаратилган. Унда Ўзбекистон технологик металлар комбинати бошқарув раиси сўзга чиқиб, юртимизнинг бой минерал ресурслари ва уларнинг стратегик аҳамияти ҳақида халқаро ҳамжамиятга маълумот берди.

Ҳозирги вақтда жаҳонда критик металларга бўлган талаб кескин ортиб бораётган бир даврда, Президентимиз ташаббуси билан ташкил этилган Ўзбекистон технологик металлар комбинати саноат учун муҳим аҳамиятга эга 20 та критик минерал бўйича 50 дан ортиқ йирик лойиҳаларни амалга оширишни режалаштирган.

Фарҳод Абдуллаев, ЎзТМК бошқарув раиси: Ушбу анжуман жаҳоннинг энг йирик саноат ва инвестициявий тадбирларидан бири ҳисобланади. Биз бу ерда ўз маҳсулотларимиз, инвестициявий имкониятларимиз ва стратегик лойиҳаларимизни халқаро ҳамжамиятга тақдим этмоқдамиз. Анжуман доирасида ўтказилган “Ўзбекистон куни” ҳам мамлакатимизнинг саноат салоҳиятини ва хомашё базасини халқаро миқёсда кенгроқ намойиш этишга қаратилган. Ушбу кун доирасида ўтказилган тақдимотларимизда Ўзбекистоннинг технологик металлар соҳасидаги улкан имкониятлари, хомашё ресурслари ва инвестициявий муҳити ҳақида тўлиқ маълумот берилди. Шунингдек, халқаро компаниялар ва инвесторлар билан яқиндан мулоқот қилиш имкониятига эга бўлдик. Албатта, технологик металлар соҳасини ривожлантириш бўйича берилган аниқ таклиф ва лойиҳалар нафақат соҳанинг етакчи мутахассисларида, балки халқаро инвесторлар орасида ҳам катта қизиқиш уйғотди.

Анжуман давомида қатор йирик хорижий компаниялар вакиллари билан саноатдаги янги технологиялар, минерал ресурсларни қазиб олиш ва қайта ишлаш, инвестиция лойиҳаларини амалга ошириш юзасидан фикр алмашилмоқда. Кўплаб компаниялар Ўзбекистон билан ҳамкорлик қилишга қизиқиш билдириб, ҳозирда музокаралар жараёнида қатор истиқболли келишувларга эришилмоқда.