Тадбиркорлик фаолиятини қўллаб-қувватлаш жамғармаси "Тадбиркорликни ривожлантириш компанияси" АЖ шаклида қайта ташкил этилаётгани муносабати билан 2024 йил 1 мартдан бошлаб тадбиркорлик субъектларига кафиллик ва компенсациялар тақдим этиш тартиби ўзгармоқда.
Кафилликлар бўйича:
Кредит, лизинг, банк кафолати ва акредитивларга тақдим этиладиган кафиллик қиймати 5 млрд.сўмгача оширилади (табақалаштирилган). Илгари 2,5 млрд.сўмгача эди. Эътиборлиси, энди нафақат банклар, балки микромолия ва лизинг ташкилотлари олдидаги мажбуриятлар учун ҳам кафиллик сўраш мумкин.
Компенсациялар бўйича:
Энди тадбиркорлиик субъектларига Марказий банк асосий ставкасидан 4 фоизлик пункт юқори ва асосий ставканинг 1,75 баробаридан ошмаган ставкада, миллий валютада 5 млрд.сўмгача ажратиладиган кредитлар бўйича асосий ставканинг 40 фоизигача миқдорда 3 йилдан ортиқ бўлмаган муддатга компенсациялар берилади. Яъни, компенсация олиш коридори 18%-24,5%лик ставкадаги кредитларга тадбиқ этилади. Компенсация 5,6% ни ташкил этади. Масалан, 24,0%дан олинган кредит тадбиркорга компенсация билан 18,4%лик ставкага айланади. Мазкур қоидалар 2024-2026 йилларга мўлжалланган. Идеалда очиқ бозор шароитида фоизларни компенсациялаш тизимидан бутунлай воз кечиш керак. Умид шуки, 2026 йилдан кейин бу тизим бошқа чўзилмайди.
Қизиқ тарафи, буёғига компенсация 1+2 тамойили асосида тақдим этилади. Яъни компенсация олган тадбиркор кейинги 2 йил давомида янги иш ўринлари режасини бажариш ва тушумни 15%га ошириши керак.
Эслатиб ўтамиз, 2024 йил бюджети лойиҳасига кўра, фоизларни компенсациялаш учун бюджетдан 940,3 млрд.сўм пул ажратилади. Шунингдек, қарор билан "Тадбиркорликни ривожлантириш компанияси" АЖга 10 йил муддатга 1,2 трлн.сўм бюджет ссудаси тақдим этиш кўзда тутилган.
