Коалицион Словакия миллий партияси (SNS) Словакиянинг Украинадан молиявий компенсация олишга ҳақли эканини таъкидламоқда.
Бу ҳақда шанба куни TASR агентлигига партия раиси офиси директори Зузана Шкоптсова маълум қилганини Teraz портали хабар бермоқда.
SNS бош вазир Роберт Фитсони Европа кенгашининг навбатдаги йиғилишида Европа Иттифоқининг Украина ерости бойликлари бўйича улуши масаласини муҳокамага қўйишга ундамоқда.
"Тарихда ҳеч қайси давлат раҳбари президент Зеленский каби АҚШ билан бундай шартнома имзоламаган. Европа Иттифоқининг ёрдами ҳам АҚШ кўрсатаётган ёрдам ҳажмига яқинлашиб қолди. Агар Украина барча ерости бойликларини АҚШга топширса, Европа давлатларига ёрдамни қайтариш имкони бўлмайди", дея таъкидлади Шкоптсова. Унинг фикрича, АҚШга Украина ресурслари бўйича мутлақ ҳуқуқлар берилиши мантиқсиз ва ахлоққа зид кўринмоқда.
