Германия канцлери Олаф Шольц Украинадаги уруш тугаганидан кейин Россия билан иқтисодий ҳамкорликни тиклаш мумкин, деб ҳисоблайди. У бу фикрни кеча, 12 декабрь куни Германия Иқтисодиёти Шарқий қўмитасининг 70 йиллигига бағишланган тантанали маросимда сўзлаган нутқида билдирди.
Шольцнинг таъкидлашича, Украинадаги уруш тугаганидан кейин ҳам Россия Европа қитъасидаги энг йирик давлатлардан бири бўлиб қолади. Шу сабабли, урушнинг тугашига тайёргарлик кўриш муҳим.
“Бир нарса аниқ. Бизнинг (Россия билан – таҳр.) муносабатларимиз энди пасаймоқда”, дейди Германия етакчиси.
Шольцнинг фикрича ҳозир Россия билан ҳамкорликни кучайтирадиган пайт эмас. Бироқ Россия бунга қачондир муҳтож бўлади.
“Урушни тугатадиган Россия ва ўзлари учун бошқа келажакка интилаётган Федерация фуқаролари ҳам иқтисодий ҳамкорликни бошқа вақтда бошлаш имкониятига муҳтож. Бироқ ҳозир бундай пайт эмас. Биз айни дамда санкцияларни кучайтирмоқдамиз”, дейди Германия ҳукумати раҳбари.
