Шимолий Корея урушга тайёрланмоқдами?

Шимолий Корея Жанубий Кореяга олиб борувчи Донгхе йўлида номаълум иншоотлар қуришни бошлади, деб хабар бермоқда «Yonhap» ахборот агентлиги манбасига таяниб. Жанубий Корея чегара хизмати маълумотларига кўра, зобитлар йўлнинг Шимолий Корея томонида конструкциялар ўрнатилишини кузатган. Ушбу тузилмалар чегара бўйлаб бетон тўсиқларни қуриш учун асос бўлиб хизмат қилиши мумкинлиги тахмин қилинмоқда.

Шу билан бирга, чегаранинг ғарбий қисмига олиб борадиган Кённгги йўлида ҳалигача бундай қурилиш ишлари кузатилмаган.

Аввалроқ, ўтган ҳафта Шимолий Корея Жанубий Кореяга олиб борувчи йўлларнинг бир қисмини портлатиб юборган эди. Шимолий Корея армияси бош штаби 9-октабрдан бошлаб икки давлатни боғлайдиган барча автомобиль ва темир йўлларни тўсиб қўйиш ниятида эканлигини маълум қилди.

Корея яриморолидаги кескинлик Шимолий Корея Жанубий Кореянинг Пхенян устидан учувчисиз учишларини эълон қилганидан кейин кучайган. Шимолий Корея, агар бундай ҳаракатлар такрорланса, «жисмоний куч» ишлатиш билан таҳдид қилган.

Сеулнинг Шимолий Корея Россияга 3000 га яқин аскар юбораётгани ҳақидаги даъволари фонида Жанубий Корея ва АҚШ қўшинлари Жанубий Кореянинг турли ҳаво базаларида 12 кунлик «Freedom Flag» қўшма машғулотларини ўтказмоқда.

Жанубий Корея мудофаа вазири Ким Ён Хён Шимолий Корея раҳбари Ким Чен Инни ўз армиясини «ноқонуний босқинчилик уруши учун» сотганликда айблаб, «Бу ёлланма аскарларнинг ўлжаси», деди.

Қўшма Штатлар Украинадаги ҳарбий ҳаракатларда эҳтимолий иштирок этишга тайёргарлик кўриш учун Россия шарқида камида 3000 шимолий кореялик аскар борлиги ҳақидаги Сеул маълумотларини тасдиқлади. Пхенян ва Москва ҳозирча бу баёнотларни тасдиқламади ёки рад этди.