Саудия Арабистони яқинида Исроилга алоқадор кема ҳужумга учради

Саудия Арабистонининг Янбу қирғоқларида ҳужумга учраган танкер Либерия байроғи остида ҳаракат қилган ва Исроилга тегишли.

Бу ҳақда Reuters Британиянинг денгиз хавфсизлигига ихтисослашган Ambrey компаниясига таяниб хабар берди.

31 август куни кечқурун Буюк Британия Ҳарбий-денгиз кучларининг Денгиз савдо операцияларини мувофиқлаштириш маркази (UKMTO) Қизил денгизда Янбу шаҳридан 40 денгиз мили жануби-ғарбда кема билан содир бўлган воқеа ҳақида сигнал олди. UKMTO баёнотига кўра, кема экипажи "қаттиқ портлаш овозини эшитган" ва "номаълум снаряд сачраганини" кўрган. Мувофиқлаштириш марказининг қўшимча қилишича, “ҳужум” сифатида баҳоланган ҳодисада ҳеч ким жабрланмаган.

Ambrey, ҳужум ортида 2023 йил кузидан бери Қизил денгиз ва Боб ал-Мандеб бўғозида Исроил билан боғлиқ кемаларга зарба бериб келаётган Ямандаги ҳутий исёнчи “Ансор Аллоҳ” ҳаракати турган бўлиши мумкинлигини тахмин қилди. Ҳусийлар Исроилнинг Ғазо секторидаги ҳарбий амалиёти тугамагунча тўхтамасликлари ҳақида огоҳлантирди.