Саудия Арабистони Европа давлатларидан ҳусийларга қарши курашда ҳарбий ёрдам сўрамоқда

Саудия Арабистони Ямандаги ҳусийларга қарши янги ҳарбий амалиёт ўтказишни режалаштирмоқда. Эр-Риёд бу жараёнда Франция, Буюк Британия ва бошқа Европа давлатларидан ҳарбий ёрдам кутаётгани айтилмоқда.

Саудия разведкаси раҳбари Туркий бин Файсал Ол Сауднинг Spiegel нашрига айтишича, Европа давлатлари минтақа хавфсизлигини таъминлашда кўпроқ иштирок этиши керак. Унинг таъкидлашича, Европа Яқин Шарқдаги барқарорликдан иқтисодий манфаат кўради, жумладан, Қизил денгиз ва Боб-ул-Мандаб бўғози орқали савдо йўлларидан фойдаланади.

Туркий бин Файсалнинг сўзларига кўра, Саудия бир неча ой аввал Арабистон яримороли ва Боб-ул-Мандаб бўғозида хавфсизлик ҳамда кузатув тизимини яратишни таклиф қилган. Бироқ Европа давлатларидан ҳеч бири ушбу ташаббусга қўшилмаган.

У Франция ҳусийларга қарши курашда иштирок этаётганини, Буюк Британия эса ҳавода ёқилғи қуйиш орқали қўллаб-қувватлаётганини маълум қилди. Миср ва бошқа давлатлар ҳам бу саъй-ҳаракатларга қўшилиши мумкинлиги айтилди.

Шунингдек, Покистон ва Туркия Саудияга таъминот, ўқ-дори ҳамда разведка маълумотлари билан ёрдам бераётгани таъкидланган.

Келаси ойда Эр-Риёдда Форс кўрфази араб давлатлари ҳамкорлик кенгаши ва Европа Иттифоқи ўртасида учрашув ўтказилиши режалаштирилган. Саудия томони ушбу учрашувда савдо келишувини имзолаш ва кейинчалик хавфсизлик соҳасида ҳамкорликни кучайтиришни таклиф қилмоқда.