Рубио: Ғарб Россияга қарши санкцияларни бекор қилишга мажбур бўлади

Ғарб мамлакатлари Россия ва Украина ўртасида тинчлик келишувига эришилганда Россияга нисбатан санкцияларни бекор қилишга мажбур бўлади.

Буни Эр-Риёдда ўтказилган Америка-Россия музокаралари якунлари бўйича брифингда АҚШ Давлат котиби Марко Рубио маълум қилди.

Рубиодан Россиянинг тажовузи туфайли киритилган санкциялар ҳақида сўрашди. "Буларнинг барчаси [Украинадаги] ушбу можаронинг оқибатидир. Бу можаро натижасида киритилган санкциялар мавжуд. Шунинг учун айтмоқчиманки, ҳар қандай можарони тўхтатиш учун барча томонлар ён беришлари шарт," - дея Рубионинг сўзларини РБК келтиради.

Рубионинг айтишича, тинчлик келишувининг якуний шартлари барча томонларни қониқтириши керак. Саудия Арабистонидаги музокаралар тинчликка эришиш йўлидаги биринчи қадам бўлди, деб ишонч билдирди АҚШ давлат котиби. Шунингдек, у Европа Иттифоқи ҳам ўз навбатида низони ҳал қилиш жараёнига жалб этилиши лозимлигини таъкидлади.

АҚШ президенти Доналд Трамп Украинадаги уруш бир неча йилдан кейин қайта бошланмаслиги учун унинг «адолатли якунига» умид қилмоқда”, — дея қўшимча қилди Давлат департаменти раҳбари.

АҚШ Давлат департаменти 18 февраль куни Украинада уруш бошланганидан бери Россия ва АҚШ делегациялари ўртасида бўлиб ўтган биринчи оммавий учрашув якунлари бўйича аниқ натижалар йўқлигини маълум қилди.