Россияда санкцияларга қарамай, 2024 йилда доллар миллиардерлар сони 125 дан 146 кишига ошди

Бу Forbes журнали томонидан тузиладиган дунёнинг энг бой инсонлари рейтинги тарихидаги энг юқори кўрсаткич.

"Шунингдек, рейтингга кирган россиялик миллиардерларнинг умумий бойлиги ҳам рекорд даражага етиб, 625,5 миллиард долларни ташкил этди. 2023 йилда бу кўрсаткич 576,8 миллиард доллар, 2021 йилда, Россиянинг Украинага кенг кўламли босқинидан олдин, 606,2 миллиард доллар эди", деб ёзади Тhe Moscow Times.

Россиялик энг бой инсонлар учлигига Вагит Алекперов (“Лукойл” асосчиси), Алексей Мордашов (“Северстал” директорлар кенгаши раиси) ва Леонид Михелсон “Новатек” раҳбари) кирди.

“Агентство” нашрининг ёзишича, Forbes'нинг янги рейтингида уч нафар россиялик бизнесмен ўз фуқаролигини бошқа давлатга ўзгартирган. Андрей Меличенко БАА фуқароси сифатида, Алишер Усмонов Ўзбекистон фуқароси сифатида, Михаил Прохоров эса Швейцария вакили сифатида келтирилган.

“Агентство” бундай ўзгаришлар, одатда, тадбиркорларнинг ўзлари ёки уларнинг вакиллари сўровига биноан амалга оширилишини қайд этди.