58-армия собиқ қўмондони генерал-майор Иван Поповга нисбатан айблов эълон қилинди, бироқ у ўз айбини тан олмаяпти. Бу ҳақда 24 май, жума куни унинг адвокати Сергей Буйновский маълум қилди. «У барча айбловларни рад этди, чунки тергов уни айблаётган нарсада иштирок этмаган», - дея ҳимоячининг сўзларидан иқтибос келтиради Россия ОАВ. Бу ҳақда Кун.uz хабар берди.
Попов Россия Федерацияси Жиноят кодексининг 159-моддаси 4-қисмига биноан (уюшган гуруҳ томонидан ёки катта ҳажмдаги фирибгарлик) ҳибсга олинган. 17 май куни у икки ойга қамоққа юборилди. Тергов маълумотларига кўра, у 2023 йилда жанговар алоқа чизиғидаги муҳандислик мудофаа иншоотларини жиҳозлаш учун мўлжалланган, қиймати 130 миллион рублдан ортиқ бўлган 1,7 минг тоннадан ортиқ металл прокатини ўғирлашда иштирок этган. «Коммерсант» нашри Поповнинг шериклари орасида Краснодар ўлкасидан бўлган тадбиркор ва Жанубий ҳарбий округ офицерини ҳам кўрсатган. Генерални ўн йилгача қамоқ жазоси кутмоқда.
Тергов ҳам, ҳимоячи ҳам суддан эҳтиёт чорасини қайта кўриб чиқиш ва Поповга уй қамоғи тайинлашни сўрамоқда. Аввалроқ Буйновский РБКга генералнинг давлатдан олинган квартираси ва иккита ер участкаси борлигини айтди. У, шунингдек, бу ишда «янада жиддийроқ шахс» борлигига ишора қилди, лекин унинг исмини айтишдан бош тортди.
Иван Попов ким?
Попов 58-қўшма қуролли армия қўмондони эди. 2023 йил июл ойида Давлат думаси депутати Андрей Гурулев генералнинг ҳарбий хизматчиларга аудиомурожаатини эълон қилди, унда у «юқори бошқарув билан боғлиқ қийин вазият» ҳақида гапирган.
Ўша ойда у Россия ҳарбий контингентининг «раҳбарларидан бири» сифатида Сурияга жўнатилди, деб ёзди Олий рада собиқ депутати Олег Царев ўзининг Telegram-каналида.
Кремл ҳозирги вазиятга баҳо бермади. Федерация кенгаши раисининг биринчи ўринбосари Андрей Турчак таъкидлаганидек, «Иваннинг виждони тоза» ва «Ватан бундай қўмондонлар билан фахрланиши мумкин».
Россия Мудофаа вазирлиги раҳбарларига нисбатан жиноий ишлар
Генерал Попов иши билан бир қаторда, яқинда Россия Мудофаа вазирлиги раҳбарларига қарши бир нечта жиноий ишлар очилгани маълум бўлди. Бир кун аввал Россия Қуролли кучлари алоқа бош бошқармаси бошлиғи, Бош штаб бошлиғи ўринбосари генерал-лейтенант Вадим Шамарин ҳибсга олингани ҳақида хабар берилган эди.
Апрел ойи охирида Москвада мудофаа вазири ўринбосари Тимур Иванов пора олганликда айбланиб ҳибсга олинди. Май ойида Россия Мудофаа вазирлигининг кадрлар бўлими бошлиғи Юрий Кузнецов қўлга олинган ва у ҳам пора олганликда айбланган.
2020 йилда Бош штаб бошлиғининг собиқ ўринбосари, генерал-полковник Халил Арслонов қуролли кучларни техника билан таъминлашда фирибгарлик ва коррупция иши бўйича қўлга олинган эди. У фирибгарлик ва пора олишда айбланган. 2022 йилда «Коммерсант» Арслоновнинг иши ёпиқ режимда кўриб чиқилишини ёзган, чиқарилган ҳукм ҳақида ҳеч нарса маълум эмас.