Россия ва АҚШ мусодара қилинган объектларни қайтариш бўйича музокараларни бошлади

Россия ва АҚШ вакиллари Америка ҳудудида амалда мусодара қилинган олтита Россия дипломатик мулкига киришни таъминлаш бўйича музокараларни бошлади.

Бу ҳақда Россиянинг Вашингтондаги элчиси Александр Дарчиев "ТАСС"га берган интервьюсида маълум қилди.

Унинг сўзларига кўра, олтита дипломатик мулкни қайтариш бўйича музокаралар жараёни аллақачон бошланган. Улар 2016-2018 йилларда АҚШ расмийлари томонидан мусодара қилинган, дея таъкидлади Дарчиев.

Элчининг қўшимча қилишича, Америка томонига реал муддатларни кўрсатувчи “йўл харитаси” берилган ва Россия дипломатик миссияси вакилларига текширув ўтказиш ва етказилган зарарни баҳолаш учун ушбу объектларга киришни таъминлаш талаби берилган.