Россия ҳужуми оқибатида Киевда университет биноси, телеканал студияси ва журналистлар уйлари шикастланди

6 июлга ўтар кечаси Россиянинг Киевга уюштирган ҳужуми оқибатида Тарас Шевченко номидаги Киев миллий университетининг ўқув корпуси, бир қатор журналистларнинг уйлари ҳамда «5-канал» телевидениеси студиясига зарар етди.

Университет ректори вазифасини бажарувчи Валерий Копийканинг маълум қилишича, портлаш тўлқини ВДНХ ҳудудида жойлашган ўқув корпуслари ва талабалар ётоқхонасига зарар етказган. Бинонинг ойна ва эшиклари синган.

Шунингдек, «5-канал» телевидениеси студияси жиддий вайрон бўлган. Телебошловчи Анна Мирошниченконинг айтишича, ходимлар орасида жабрланганлар йўқ, аммо студиядаги техника ва иш жойлари катта зарар кўрган.

Телеканал раҳбариятининг билдиришича, контент ишлаб чиқаришнинг асосий техник тизимлари шикастлангани сабабли ҳозирча эфир орқали кўрсатувларни тиклаш имкони йўқ. Шу боис дастурлар вақтинча YouTube орқали узатилмоқда.

Ҳужум натижасида «Медиацентр Украина» коммуникация менежери Светлана Чепуренко ва «ТСН» мухбири Катерина Федорченконинг Подольск туманидаги уйи ҳам вайрон бўлган. Улар ҳужум вақтида бошпанадан жой олгани учун жабрланмаган.

Бундан ташқари, «1+1» телеканали журналисти Светлана Березивська яшайдиган турар жойга ҳам дрон зарбаси берилган.