Россия асирлигида ҳалок бўлган украиналик журналистнинг мияси, кўзи ва ички аъзолари олиб ташлангани аниқланди

Франциянинг "Forbidden Stories" нотижорат ташкилоти раҳбарлигида ўтказилган қўшма тергов натижасига кўра, россиялик расмийлар украиналик журналист Виктория Рощинанинг жасадини Украинага қайтаришдан аввал, унинг кўзлари, мияси ва бошқа бир неча ички аъзоларини олиб ташлашган. Рощина 2023 йил сентябрь ойида Россия асирлигида ҳалок бўлган, у биринчи марта 2023 йил августда Россия томонидан босиб олинган ҳудудда ушланган эди.

Журналистлар билан суҳбатда украин ҳуқуқни муҳофаза қилиш органлари ва суд-тиббиёт мутахассислари қуйидагиларни маълум қилишди:

• Виктория Рощина 2023 йил август ойида ғойиб бўлган. Россия ҳукумати уни қўлга олганини фақат 2024 йил май ойида тан олган.

• 2024 йил октябрда Россия Мудофаа вазирлиги Рощинанинг отасига мактуб йўллаб, унинг 2023 йил 19 сентябрда вафот этганини билдирган.

• 2025 йил 24 апрелда Украина расмийлари унинг жасади қайтарилганини эълон қилишди.

Терговга яқин манбанинг маълум қилишича, Рощинанинг кўзлари, мияси ва овоз найининг бир қисми олиб ташланган. Шунингдек, бўйин қисмида жойлашган hyoid суяги (овоз найи остидаги суяк) синдирилган.

Суд-тиббиёт экспертининг таъкидлашича, бу аъзоларни олиб ташлаш эҳтимолан қийноқ изларини яшириш мақсадида қилинган. Эксперт шундай дейди:

“Аутопсия пайтида овоз найини олиб ташлаш нормал амалиёт эмас. У strangulyatsiya (бўғиш) ҳолатларида муҳим далил бўлиши мумкин. Бундай ҳолларда кўпинча hyoid суяги синган бўлади. Кўз тўқималарида қон йиғилиши ва мияда кислород етишмаслиги излари ҳам аниқланиши мумкин.”

Украина уруш жиноятларини тергов қилувчи мутахассис Юрий Белоусовнинг айтишича, Рощинанинг жасадида бошқа қийноқ аломатлари ҳам бўлган: танада тирналишлар ва кўкаришлар, синган қабурға, бўйин жароҳатлари ва оёқларда электрошокдан қолган эҳтимолий ёниб кетиш излари.

Ҳозирча ўлимнинг аниқ сабаби аниқланмаган.

Украина ҳуқуқни муҳофаза қилувчи манбанинг маълум қилишича, Россия томонидан қайтарилган тутқунлар жасадида ички аъзолар етишмаслиги ҳолати аввал ҳам кузатилган. Россияликлар буни “аутопсия протоколи” деб изоҳлашса-да, бу амалда қийноқ ва зўравонлик изларини яширишга хизмат қилиши мумкин.

2025 йил март ойида украин журналистлари “Виканинг охирги топшириғи” номли ҳужжатли фильмни намойиш қилишди. Унда Рощинанинг Россия қамоқхонасидаги собиқ камерадоши унинг сўнгги ойларда бошидан кечирган шафқатсиз қийноқлар ва инсонга хос бўлмаган шароитлар ҳақида сўзлаб берган.