Роналду нима учун 1000 та гол уришни исташини айтди

"Ан-Наср" ҳужумчиси Криштиану Роналду нега ҳали фаолиятини якунлашга шошилмаётганини тушунтирди.

Сешанба куни 40 ёшли футболчи Португалия терма жамоасидаги 22 йиллик фаолияти учун бериладиган Globo Prestígio мукофотига сазовор бўлди.

«Одамлар, айниқса оилам, шундай дейишади: “Энди тўхта, сен барчасига эришдинг. Нима учун мингта гол уришни хоҳлайсан?” Аммо мен бундай ўйламайман. Менимча, ҳали ҳам яхши ўйнаяпман, клубим ва терма жамоамга ёрдам беряпман. У ҳолда, нега давом этмаслик керак?

Фаолиятим тугаганда, мен ўзимни қониққан ҳолда тарк этишга ишончим комил, чунки қўлимдан келган барча ишни қилдим. Биламан, менга кўп йил қолмаган, аммо бу йиллардан завқ олишга ҳаракат қиляпман», — деди Роналду.